Ang song, A∙chik a∙song. Ia kattako darang A∙chik jat ripengskarang pilakan namen dal∙e ra∙e gisiktango chanchibewale janggi tangbagiparang ong∙a. Darang mandean jattangna a∙jatangna chigatangna ka∙saa aro jattangni dakbewal rikbewalrangna namen rasong chabea. Ma∙gitcham pagitchamrangni daka rikarangko nipilate nion, aiao namen ga∙sua aro ia dakbewal rikbewalko ripingna nanga ine sakantian gisiktango chanchiani gnang.
Ia chasongo bang∙a A∙chikrangni songdongenggipa biaprango chasong gitchamni daka-rikanirangko aro ja∙rikanirang namen komiangaha ine nikna gita man∙engaha. Adita bang∙gija songrangosan ia gitcham dakbewal rikbewalko ripinge ja∙rikaniko nikna gita man∙aiaha.
Chengo A∙chikrangni Tibet a∙songoni katbamiting somoirango uamangni jattangna janggi on∙kange bakrimaniko aro ku∙cholsan ong∙aniko knana gita man∙baaha. Uamangko bobil chadrapgenchim ong∙ode bilsokgipa me∙asasan ong∙aigija, me∙chikma detangna sok kanenggipamangba bi∙satangko dongalari mil∙am sepi de∙dingdange warachaksoaiachim ina. Ia kattarangko knabaani gitade, ia chasongo an∙ching A∙chik rangni jatska baksa melie ku∙cholsan bakrimanirang komibatangaha gita nikna man∙enga.
Ia ku∙cholsan ong∙e bakrimaniko miksonge agananiara, da∙ororo an∙ching jatni jatska baksa meligijako, mahari chatchiko ingrik solgrikaniko, Assamni ba Meghalayani A∙chik ine baseaniko social mediarango bang∙en niknagita man∙enga. Saoba saksa maiba namgija dakgualani kamko ka∙ahaode, uko ka∙sachake janggitanganio nambatatna ku∙pattianirangko on∙ani pal, batesa social mediarang-o mesokate jaksi ote ka∙dingsteke intekanirangkosa dakskaenga. Ia kamrangchin mittam manderangko kratcha∙ataona, gisik saataona aro janggi tangao dakna aro krengna sikaniko ra∙onaonaba sokata.
Ia indakgipa obostarangchin, manderangni jatskako ingrike chonnike jatni gisepo meligrikgijanirang ong∙engon, chengo ma∙gitcham pagitchamrangni jattangna on∙kange kam ka∙ako, melie nangrime dongako gisiktango chanchibewale hai an∙ching an∙tangtangko nipilate nina.
Da∙ororo dingtang dingtang biaprango aro a∙doko jatsa jatgipin baksa so∙sojengjeng ong∙anirangko niknagita man∙enga. Ia obostarang ong∙genchimoba, jattangna on∙kange bang∙a dabianirangko aro jegalanirangko dakengon uamang ku∙cholsan ong∙e jatskana chakgrime ja∙ku de∙e kamrangko ka∙enga. Uamangni ku∙cholsan ong∙e kam ka∙e chu∙sokatna man∙arangko nie skie ra∙e, songsalo ma∙sichakgrike janggi tanggiparang ong∙na. Uandake an∙chingni A∙chik jatni bak rengsi ko man∙pana dabianirango aro ja∙ku de∙anirango krimkro ong∙e bakrime jakko on∙e hai jat tangko tang∙doatna re∙mikkangna mangsongna.
