Bilsi 12 na skang Tura-ko winter capital songna ANVC aro ANVC-B dolrangni ma∙mong sorkari baksa tom∙tomgrikanina soi ka∙anio mongsonggipa dabiani ong∙e on∙a dongaha ine Tura ni MDC Bernard N. Marak aganangaha. Garo hills ko winter capital songna bilsi 50 na skang ku∙rachakgiminko a∙dokni dilgiparang watgalaha jekon ia tom∙tomaniko soi ka∙anio janaptaia dongachim ine Marak parakangaha. Iani bidingo sorkari baksa somoi gita chanchirimna lockdown ni a∙sel neng∙nikaniko changrongaha aro pilak nangchongmotgipa dabianirangko sorkari galchangaha ine MDC aganangaha. Da∙o winter capitalna A∙chikrangni dabienganiara kakketgipa aro nangchongmotgipa ong∙a ine ua agandapangaha.
BJP dolrang A∙chik jatrangni Meghalaya a∙dokko man∙a dakgrikgiparangko gisik ra∙a aro pilakan jattangni mikkangchini namgnina, dakarika bewalrangko, a∙jatang ku∙tangko ripingna janggiko on∙kangangkuenga ine Marak parakangaha. Mini Secretariat-ko ra∙banaba election-ni somoio nangchongmotgipa ong∙e jatna aro a∙dokni manderangna ku∙rachakgimin gita BJP kam ka∙na miksonganirang gnangchim ine Marak aganangaha. Da∙o jatni dabienggipa Tura ko winter capital aro bang∙a a∙jatango dingtanganiko ra∙bana dakgrikenggiparangni on∙kanganirang indin ong∙gramaigipa ong∙na nangja ine ua agandapangaha.
