United Naga Council (UNC) dolrang Naga me∙chik-ko so∙otaniko jegale iani bidingo a∙dok sorkari aro bichal ka∙giparangko sing∙sandianiko dake dosi dakgipa mandeko rim∙china dabiangaha.
July jani 15 tariko Chandel a∙jani Narum songoni Lucy Marem jean Thoukhal Marem-ni demechik ko, Meira Paibis (Women Torch Bearer) dolrang drae rim∙enba Arambai Tenggol dolrangna pakwatataha. Ia dakchakgipa sipai dolara da∙ororo Manipur-o so∙sojengjeng ong∙anio namgija kamko ka∙e niksenggiparang ong∙a. Lucy Marem ko Naga me∙chik ine u∙igenchimoba uko so∙otaha ine UNC dolrang kobor ra∙timgiparangna parakataha.
Meira paibis ba me∙chik dol tom∙tomaniko ra∙bana kam ka∙giparang ong∙oba dos gri mandeko so∙otaniara ong∙na amgijani kragija bewalko mesoka ine UNC jegale aganangaha.
Meitei aro Kuki jatrangni dakgrik dinggrikna a∙bachengaonin Naga jatrang tom∙tomaniko aro cheaniko on∙a gita kamko ka∙enga.
Ia so∙sojengjeng ong∙ani somoio uamangkoba bak nangatgenchimode nie dongjawa ine aganangaha. Batanggimin salrango uamang jatni chakchikani aro manderangna dongchakna on∙e dakchakani kamrangko bilgri ong∙ani chin ine ra∙e ka∙o nange, gamjin rangko nosto ka∙aniko dake, saknaatani aro kratcha∙atanikoba dingtang dingtang biaprango on∙enga ine kobor-na u∙iatangaha.
A∙dok sorkari ta∙rake bichal ka∙anirangko, sing∙sandianirangko dakna nangchongmota aro dosi gnanggipa manderangko rim∙na nanga. Unbaksana Meira paibis dolko Lucy Marem-ko so∙otanio bakrang dongpaanina Naga Customary Law-ni gita kakket bichal ka∙e on∙chinaba UNC aganangaha.
Ia ka∙namgijagipa kamni bidingo Meitei Civil society dolrangba daito donggiparang ong∙na nanggen aro uamang mai kamrangko ka∙enga u∙iatna nanggen. Indake ia ka∙saninggija dos gri so∙otaniko man∙gipa Lucy Marem-ko gisik ra∙aniko dakna gita konta chi∙gnina Manipur a∙doko Naga rangni songdongenggipa biaprango pring 6 bajioni attam 6 bajiona chu∙gimik chipaniko July 17 tarik, da∙al salni bako dakangenga. Ia dabianiko konta 48-ni gisepon chu∙sokatjagenchimode dingtang ja∙ku de∙aniko dakanggen ine UNC dolrang parakataha.
