A∙chik Conscious Holistically Integrated Krima (ACHIK) dolrangni okgimu chakani snigipa salo rang∙san bakrimgiparangni tang∙doaniko Sombar salo nikna man∙aha. Garo Hills-ni dingtang dingtang dolrangni NGO rang jekai AAYF, NIKSAMSO, ASWA, TGCSU, New Tura Development Forum (NTDF) aro adita ma∙aparang uamangni chakpaaniko on∙a re∙bae bakko ra∙angaha. Ia apsan salon WGH a∙jani DC Jagdish Chelani re∙bae uamangni nangnikaniko adita golpoe u∙ie ra∙angaha. Uni aganani gitade Chief Minister Conrad Sangma ia dolrang baksa ru∙utgija somoion re∙bae golporimaniko dakanggen ine u∙iatjolaha.
Ia dabianiko chinga darang jatko galona daka ong∙ja indiba bilsi 50-na chingni man∙gniko on∙china roster system-ko batanggimin salrango ong∙baaniko nipiltaie kam ka∙na dabianisa ong∙a ine ACHIK-ni General Secretary Bernita Marak aganangaha. Tura-ko winter capital songna an∙chingni pagitchamrangni kusi ong∙e ra∙chakmangimin ong∙a aro iako chingna ra∙bae on∙a nanga ine ua agandapangaha.
District administration aro sorkarioni darangba re∙bae uamangni okgimu chaka salsni ong∙piloba sing∙sandie nia dongja ine ua agandapangaha. Ardent Basaiawmoit ni okgimu chake dabianiko dakode salgittamni gisepon Minister-rang aro manderang re∙ange uni an∙seng baljokaniko sing∙sandie nietokaha ine Marak parakangaha. Dabianiko dakenggiparang chikosan ringe dongtokenga aro mikkangchi indake ong∙aiode saa ding∙anirang batanggen ineba ua aganangaha.
