Health Minister Ampareen Lyngdoh a∙doko Tura-ko Winter Capital songna dabienganiko knachakna nangja ine da∙al salni bako aganangaha. A∙dokni kamrangko niroknagita Block office rangko songe on∙angaha jedakode nambata cholrangchi manderangni neng∙nikaniko nengrabate ma∙sie sorkarini kamrangko ka∙na man∙gen. Shillong kon a∙dokni skotong songjinma songahani gimin gnigipa skotong songjinmako songtaianiara sorkarina a∙dokko nirokanio aro sason ka∙anio neng∙nikanisan ong∙aigen ine ua agandapangaha.
Unbaksana indakgipa dabianirangko knachaka ong∙ode a∙dokni gipin district rangba apsan daken uamangni a∙jaonaba Summer, Autumn ba dingtang dingtang Capital ko dabina a∙bachengnok ine Lyngdoh kobor ra∙timgiparangna parakataha.
