Ong∙gijagipa tangkarangko jakkalanina Assam pulis sakbri manderangko rim∙a

Assam-ni Special Task Force (STF), ong∙gijagipa tangkarangko jakkale saksa sakgipinrangna watgrikanirangko dakenggipa dacoit ba sekdrae ra∙gipa sakbri manderangko July jani 17 tariko rim∙aha. Assam-ni STF dol July jani 16 tariko koborangko man∙enba 2:30 baji mango Assam-ni Nagaon a∙jani Owona songona re∙ange sekdrae cha∙giparangko rim∙aha.

Rim∙a man∙gipa manderangoniko pistol ge∙sa, Ertiga gari bolsa, aro mobile phone ge∙briko man∙aha. Dosiko dakgipa manderang Nagaon a∙jani Rupahi PS jolni manderang ong∙a aro uamangni kosako niamni gita badi ka∙aniko dakangaha ine STF dolrang parakataha.