Central Silk Board (CSB) ni Muga ba Eri Silkworm (resom kilding) Seed Organisation technological orientation programme ko Directorate of Sericulture ni ning∙o kam ka∙giparangna July 18 oni a∙bachengataha.
Ia tom∙aniko North Garo Hills a∙jani Resubelpara o July 29, sonibar ona ong∙atanggen aro ia programme-o a∙jani sak kolgrikbonga a∙dok sorkarini officialrang bakko ra∙angenga.
CSB ni BN Sarkar tom∙anio mongsonggipa sokgipa ong∙an baksa programmeko dilgipaba ong∙a. Muga ba Eri jo∙ongrangko jile kildingrangko bikote dingtang dingtang daka rikanichi maikai gitalgipa kamrangko sericulture ni gita nakatatna man∙a aro songsalko tang∙doatna CSB training programme rangko ong∙atenga ine Sarkar aganangaha.
Muga ba Eri jo∙ongrangko jilanichi Garo Hills a∙ja tang∙doan baksana bang∙a kamgri dongenggipa rangna dakchakani ong∙gen ine Sarkar ka∙donge agandapangaha.
