Re∙anggipa somoirango Meghalaya sorkari a∙doko chioniko bijoli bikotaniko namdapatna NTPC baksa MoU ko soi ka∙e songgigrikaniko dakaha. Ru∙utbea salrangoni bijoli bikotna niksamsoe tarienggipa Kynshi project aro Myntdu-Leshka Hydro Electric Project (MLHEP) rangko sorkari nengrae kamrangko ka∙na amagita cholrangko sandienga ine MeECL Chairman Cum Managing Director, Sanjay Goyal aganangaha. Ia damgni project-rang 10-20 MW mangni gita bijoli bikotna man∙gen.
Project-ni gimin name poraie tarina Detail Project Report (DPR) ko gnigipa phase MLHEP na matchotnasiengaha. Jensalo DPR matchotaha ong∙ode tangka paisarangko chamatna cholrangko sandie aro maidakgipa dakchakanirangko ma∙mong sorkariniko man∙a amgen pilako nigrike kam ka∙na nanggen ine Sanjay Goyal aganangaha. Kynshi project-ni kam ka∙anirang chu∙sokatna amkujaengani gimin nambata cholrangko sandie MeECL kam ka∙angskagen ine Goyal agandapangaha.
Bijoliko nirokani altugipa ong∙ja jeon bijoli man∙ani aro jakkalna nanganiko agansona man∙ja ine Goyal parakangaha. Bijoli wataniko a∙doko chu∙onge on∙a man∙jaha ine ra∙chakenba ian MeECL ni gipin bijoli bikotgipa company rangni dakchakaniko man∙jaesa ong∙aha ine ua agandapaha. Iani a∙sel sorkari ra∙sroe ba bree bijoliko ra∙bana nangaha. Bijoli bikotgipa company-rangna MeECL da∙o gro jin nangarang dongja aro pilak obostarangko tom∙tome namatpilna jotton ka∙angenga ine ua agandapangaha.
