Manipur a∙doko kragija dake mechik sakgniko ba∙ra kancha gri re∙jojoataniko jawilwatrango nikna manangaha. Ia niam gri dakaniara India a∙songosan ong∙aigija a∙gilsak gimikon ra∙chakna amgijani ong∙a. Ia jawilwatko nike manderangni gisepo jingjengataniko man∙enganina Manipur sorkariko iani bidingo raken kam ka∙na nanga ga∙akenga ine Supreme Court didiangaha.
A∙dokni Prime Minister Narendra Modi ia mamlao namgija kamko ka∙gipa mande sakantikon raka sasti ba bichalko on∙angen ine u∙iata. Unbaksana Home Minister Amit Shah, Manipur a∙dokni Chief Minister Biren Singh ko gronge agangrikaniko dakangaha. Jatsa jatgipin baksa dakgrik dingrikanio me∙chik manderangko kragija dake jakkalaniara a∙songni niamko mande ra∙gijaniko mesoka. Manderang pilakan ia jawilwatko nisoe gisik neng∙nikaniko man∙aha aro Manipur a∙dokni sorkari nanga kamko ka∙jaode Supreme Court ni gita ja∙ku de∙angskagen ine Chief Justice DY Chandrachud aganangaha.
