Bristibar salo a∙dokni cabinet tom∙bimonganiko dake diesel-ni damko 50 paise ba anachetchi bariatna tik ka∙angaha. Assam aro Shillong ni gisepo petrol ni dam dingtangani a∙sel a∙dok cabinet diesel ni damko bariatna ra∙chakaniko Chief Minister Conrad Sangma parakataha. Guwahatio dieselni damara gong 90.33 aro Khanaparao gong 84.10 ong∙e, gong 6.23 mang dingtanggrikani a∙selo a∙dokni kajina man∙aniko nigrike sorkari damko bariatna tik ka∙skaaha. Iachi a∙doko kajina man∙dapani crore 5 ba 6 man∙a ka∙dongsoenga ine Sangma janapangaha.
Ia ja∙kuko de∙anichi salantio jakkalenggipa bosturangchi nangchakenaba donga ine Sangma agandapangaha. Unbaksana Value Added Tax (VAT) ra∙aniko excise, petrol aro dieselna dingtangatnaba cabinet chanchiangaha. Jagittamprako petrol pumprang batanggimin salo sorkarina VAT ko gamna nanggipako, jasani gisepon gamna nanggen ine sorkari tik ka∙angaha.
