Health Minister Ampareen Lyngdoh, July 20 tariko Tura-ona re∙baaniko, ACHIK aro gipin dolrangni jegalsoaniko man∙e Shillong-china an∙pilangaha ine koborko parakataha. Uni re∙baaniko jegalsoani ja∙pangara adita salna skang Tura-ko winter capital songna dabienggipako ra∙chakna nangja ine Lyngdoh ni agangipa kattana, ACHIK dolrang jinma bike rango ong∙kate chrik a∙boke namnikgijako parakangskaaha.
Lyngdoh, Tura circuit house-o salsana waltue Sukrobar pringo West, South West aro South Garo hills damgittam a∙ja baksa tom∙bimonge nipilani dongachim ine parakataha. WGH a∙jani DC Jagdish Chelani-ni u∙iataniko man∙e Lyngdoh Shillong re∙pilangna tik ka∙angaha. Winter capital-na dabianiko Chief Minister-ni ku∙watna skang Lyngdoh-ni agananina namgijagipa kamko mesoksoenga ine jegalsoenggiparang parakangaha.
Uni re∙baaniko jegalsona ACHIK dol baksa Garoland State Movement Committee (GSMC), Tura Government College Students Union (TGCSU) aro United Garo People’s Front (UGPF) dolrangba bakko ra∙angpaaha.
