A∙chik Conscious Holistically Integrated Krima (ACHIK) dolni okgimu chake Tura-ko winter capital songchina dabianiko dakenggipana All Khasi Hills A∙chik Federation (AKHAF) dolba chakna jak on∙paaniko mesokaha. Tura-ko winter capital songna miksonganiara ru∙utbea bilsionin ong∙a jekon da∙o sorkari dal∙a ja∙ku de∙aniko dakna nangenga ine AKHAF dolrang parakangaha. Ian A∙chik jatni ru∙utbea salrangoni nikjumange senge dongenggipa ong∙a ine uamang agandapangaha.
Cabinet Minister Ampareen Lyngdoh-ni agangimin kattarangko jegale aganengon, uni kragija agananiara gisikgri ong∙aniko mesoka ine AKHAF aganaha. Unbaksana chadamberang dingtang dingtang kamrangna galna man∙a gita a∙dok sorkariko roster system-ko tarakale kraa bewalo ra∙gate on∙china didiangaha. Khasi hills o dongenggipa A∙chikrangni District Selection Committee (DSC) o kam man∙a neng∙nikanikoba AKHAF dolrang janapangaha. Khasi hills-osan ong∙aigija Garo hills-oba uamang DSC o kam man∙a neng∙nikaniko parakangaha.
DSC-ni kamrango Khasi hills o songdonggipa A∙chikrangna reservation ba kanggimin kamrangko on∙ani maming songgimin niam dongja ine uamang janapangaha. DSC kamrangko a∙janigita nigrike manderangko kamrango rakkiani ong∙a aro iani bidingo a∙dok sorkari uamangko ra∙napna gita dingtangmancha niamko tarina chanchirimaniko dakna nanga ine AKHAF agandapangaha.
