Food Corporation of India (FCI) plastic-ni merongko palatenga ine kenaniara aro ma∙sisretaniara kakketgipa ong∙ja. Plastic-ni merongko tarina chong∙motgipa merongna bate dam rakbatani ong∙gen ine FCI-ni General Manager SK Yadav talate on∙angaha. Gipin a∙dok sorkarioniko chinga da∙o dipet matnangako man∙kuja ine Yadav kobor ra∙timgiparangna parakataha.
Merongrang song∙manani ja∙mano sa∙alanirang ong∙telaigipa ong∙a indiba mitam manderang merongni sa∙ale bimang bakroaniko nike plastic merong ine chanchisretenga. Je manderangan plastic merongko palatenga ine u∙isretgipa manderang chingni godown-oniko re∙bae niena man∙gen ine SK Yadav aganangaha.
A∙dokona merongrang sokbaengon, merongni nama namgijagipako toe niani gadang dok ba sni porikka ra∙e niani bakrang donga. Skanggipa porikka ra∙e nianiko game ge∙e cha∙ani bidingo aro cha∙ani ringani nama namgijako tale ma∙sigiparang dakronga. Unbaksana merongrangko a∙dokona watatna skang, porikka ra∙e nina a∙dok sorkari aro FCI dake on∙ronga. Merong nama namgijako porikka ra∙e nie a∙dok sorkari ra∙chakna ba jegalaniko dakna maming champenganirang dongja ine Yadav aganangaha.
Cha∙anirangko donchakaniko dal∙dapatna aro bariatani North East-o 40 percent mang bilsi gittamni gisepo tang∙doangaha jeon 87,070 tonnes-oni 1,22,636 tonnes on∙a ong∙skaaha ine parakataha. Pradhan Mantri Garib Kalyan Anna Yojana (PMGKAY) Scheme-ni gita 7.5 lakh tonnes ni gita April 2020-December 2022 ona indin merongrangko suale on∙enga ineba Yadav parakangaha.
