South West Garo Hills a∙jani Mahendraganj pulis dolrang sakgittam cha∙uanio jak donggipa manderangko noko napdrae rim∙aha. Pulisrangni parakatani gitade, uamang Kawahagre song damsaoniko Juda Marakni noko wal 11:45 bajimango napdrae tangka gong 11,600 ra∙angaha aro uko so∙otna ka∙mikenate donangaha ine u∙iataha. Salgipino Marak Mahendraganj pulis nokona re∙ange mokordoma ka∙ani ja∙mano pulisrang am∙sandianiko dake uamangko rim∙na man∙aha.
Rim∙ako man∙gipa sakgittam manderangara, Purakhasia Madra songni Walseng Sangma, Adanggre Koinadubi-oni Rakkam Sangma aro Sandagre Chenggapara oni Minggan Sangma ong∙a. Uamangoniko matsramgipa chakku bolgni, kakki chola aro bike bolsa (ML 08A 8035) koba man∙aha. Pulis dol uamangko bobil dake chakatgipa dolrangoniba ong∙a ine parakataha. Ia mamlani bidingo pulis dolrang am∙sandianiko dakangkuenga ine u∙iataha.
