Meghalaya a∙dokni skotong dilgipa Conrad Sangma gamchatbegipa Durand Cup ni trophy rangko dal∙begipa dakwelanio a∙dokni convention centre-o ong∙atgipa programme-o oprake on∙angaha. Durand cup Asia a∙jao bongagipa gitchambatsranggipa robol kal∙susaani ong∙a jekon India-ni army rang ong∙atronga. Ian 132 changna ong∙atenggipa kal∙susaani ong∙gen jeon a∙songni mingsinggipa, niksenggipa robol kal∙gipa dolrang bakko ra∙e susaanganiko nikanggen.
Ia kal∙susaaniko 2023 bilsini August 3 tariko Guwahati songjinmao Northeast Derby aro Northeast United FC (NEUFC) baksa kal∙ate a∙bachengatna manchiangaha. Meghalaya a∙dokni robol kal∙gipa dol Shillong Lajong-ba skanggipa changna iano bak ra∙anggen jeon uamangni kal∙aniko August 4 tariko nikangskagen.
Re∙baenggipa 2024 bilsini Durand Cup ko Shillongo sokachakanggen ine Conrad Sangma ia programme-o uni agananio parakangaha. Meghalaya a∙dok adita neng∙nikanirangko man∙e 2023 ni Durand Cup ko sokachakna man∙jaha indiba 2024 o sokachakna jotton ka∙angskagen ine ua parakangaha. Ia dal∙begipa kal∙susaaniko-ko sokachakna sorkari rika cho∙ani kamrangko a∙dokni dingtang dingtang biaprango tarisamsoenga ine Sangma parakataha.
