Niti Aayog ni Meghalaya-ko kangalbatsranggipa a∙dokrangoni ge∙sa ong∙a ine parakataniara 2018-19 bilsioni segate rakkigimino pangchakesa on∙aha aro ia report-ara bilsi 4 na skang segatgimin gitcham report-sa ong∙a ine CM Conrad K Sangma parakataha.
A∙dokni tang∙doaniko gital National Family Health Survey (NFHS) report o name talbate ma∙sina man∙gen jekon ru∙utgija salni ja∙mano nikangna man∙gen ine Sangma aganangaha. Ia report-rango parakataniko sorkari dal∙nike ra∙na nanga jedakode a∙doko chagrongenggipa neng∙nikanirangko nambatatna gita krenge kam ka∙na amgen ine Sangma janapangaha. Gitchamgipa report o adita bilsirango tang∙doanirangko janapa dongja jekai 2020, 2021 aro 2022 bilsirango a∙doko bang∙bata kamrangko ka∙aha ine Sangma agandapangaha. Songsalo janggi tanggiparang ong∙e an∙ching ia neng∙nikanirangko u∙ie ra∙na nanga jedakode ja∙kurangko de∙e dingtanganiko ra∙bana amgen ine Sangma parakangaha.
