Gambegre Constituency ni MLA aro Opposition Chief Whip Saleng A. Sangma, Tura-ko Winter Capital songna dabiani bidingo maming namgijani dongja ine kobor ra∙timgiparangna aganangaha. India a∙songni adita a∙dokrango skotong songjinma damgni songgiminrang gnang. Uni agananio Sangma, adita a∙dokrang jekai Khasmir o Jammu aro Srinagar, Himachal Pradesh o Dharamshala aro Shimla unbaksana Karnataka o Bangalore aro Belgaum ni damgni skotong songjinma donganiko tosusae janapangaha. Meghalaya a∙dokoba damgni skotong songjinma donganiara maming neng∙nikani dongja aro iako dabianiara kakketgipa ong∙a ine ua aganangaha.
Indakgipa dabianirangko ra∙chakaniara sorkarini jakosa ong∙a jeon Tura-ko sin∙karini skotong aro Jowaiko autumn-ni skotong songjinma songnagita uamangni kamosa pangchaka ine Sangma parakangaha. Sangmani aganani gitade ia dabianiara gitchambegipa ong∙a, jeon All Party Hills Leader Conference (APHLC) dolni pagitcham dilgiparangni gisepo kusi ong∙e ra∙chakgimin ong∙a. Turao Winter Capital-ko songna ra∙chakgimin ong∙oba maini a∙sel da∙ona kingking iako ra∙gate on∙a man∙kujaenga uko ma∙sina Meghalaya a∙dokni itihasko nichengna nanggen ineba Sangma parakangaha.
