Chief Minister Conrad Sangma ni ACHIK dolrangko July 24 tariko Tura Circuit House o gronge chanchirimna okamaniko Mini-Secretariat-o dakangskana gita CM ko ACHIK dol mol∙molangskaaha. A∙chik a∙songona rika cho∙ani aro dingtang dingtang kamrangko sin∙karin somoi rango ra∙bana man∙agita Tura ko Winter Capital na dabianiko dakangenga. Unbaksana re∙anggipa bilsi 50 na A∙chik rangni man∙a nanggni kamrangkoba nitaipilchina uamang Backlog policy ni bidingoba dabianiko dakenga.
Mini-Secretariat Tura songjinmani sorkari office rangni bijangchio ong∙ani gimin manderang baksa apsan chanchirimaniko dakna man∙gen ine uamang Chief Minister na chittio janapataha. Winter Capital aro Backlog policy ni gimin golpoani somoio, wilwilao donggipa manderangkoba bak ra∙ate chanchirimaniko dakna man∙o nambatgen ine ACHIK dolni ku∙wattimgipa Laben Ch. Marak aganangaha. Ia okgimu chakanio chinga da∙o sal 13 gapaha indiomangba chingni nangnikgipa dabianirangko chu∙sokatna man∙jagenchimode ia jingjengataniko dontongatkujawa. Okgimu chakanio bak donggijagipa dilgiparang na bate CM baksa golporimaniko daknagita chingan krabata ineba ua agandapangaha.
Ru∙uta bilsirangna A∙chik jatni nangnikgipa dabianirangko aro neng∙nikanirangko ma∙sichake ia Winter Capital aro Backlog policy ni bidingo Chief Minister nambegipa ja∙ku ko de∙na gita nanga. Ia nipiltaianiko dakanichi A∙chik a∙song mikkangchi namroro silrorona aro sorkarini kamrangkoba songdongenggipa manderangna altubate ra∙bana dakchakanggen ine Laben Marak aganangaha.
