West Garo Hills, West Khasi Hills aro Ri-Bhoi a∙jarango ma∙mongni ba a∙dokni chamatgipa rika cho∙anirangko salgittamna nirokani programme ko ong∙atangaha. Ia somoio uamang bang∙a kamrang chu∙sokna ru∙utengani gimin aro maiba nangdaparang dongode uko janapchina ma∙sie ra∙na nirok sandianiko dakangaha. Ia programme-o Raksamgre MLA Limison D Sangma, Mahendraganj MLA Sanjay Sangma, Jowai MLA Wailadmiki Shylla, Umroi MLA Damanbait Lamare aro Selsella MLA Arbinstone Marak bakko ra∙angaha.
Uamangni nirokanggipa adita rika cho∙anirangara WKH a∙jani Lawbyrtun Mawthadraishan-o Residential School, Polytechnic Institute Nongstoin, EGH a∙jani Rongjeng Nongchram o Demik Residential School aro Samanda Block-ni ning∙o donggipa Nengkra-ni Eklavya Model Residential School rang ong∙a. Committee-ni dilgiparang re∙baenggipa antio grongtaianiko dakange am∙sandie man∙giparangni bidingo nitaienba kamrangko ka∙na nisamsoaniko dakanggen ine u∙iataha. Iako dakanichi chinga ku∙chakgiminrangko chu∙sokatna jotton ka∙e kamrangko ka∙gen ine committee parakangaha.
