Mijal salni bako North Eastern Indira Gandhi Regional Institute of Health & Medical Sciences (NEIGRIHMS) hospital-o chadambe saksani janggi galaniara Doctor aro uno kam ka∙giparangni simsakgijani a∙sel ong∙a ine ding∙chaoe nanggrikaona sokangaha. Sianggipani mahari ma∙drang aro ripengskarang hospitalni security ba nitimenggiparang baksa nanggrikaona sokangpilaha ine koborko man∙soaha.
Sianggipa mandeni mahari madrang ni aganani gitade ua chadambe Umiam jolo a∙sel ong∙anio ja∙arango mata bu∙a ba saknaaniko man∙aha. Uko NEIGRIHMS hospitalona ra∙ange emergency ward o done konta bri mangna sannaniko dakgija galchipani a∙selsa janggi galaha ine u∙iataha.
Ua chadambeko uamangni bil amma dipet janggi jokatna jotton ka∙beaha indiba uni saknaa bilongbeahani a∙selo ua 2:30 bajio janggi galaha ine NEIGRIHMS ni official-rang galchipe dona ine matnanganina jegale aganskaaha. Ua chadambeko ka∙bako bilsubee saknaaniko man∙ahanina X-ray aro ultrasound rangchi porikka ra∙eba nia dongaha ine uamang parakangaha.
Doctor rang dongja ine dosi gale agananina, sak sni dongkamgipa junior doctor rang aro sak gittam Chief Medical Officer rang gnang ine saksa official aganaha. Directorate and Medical Superintendent of NEIGRIHMS songjinmani a∙palo ong∙ani gimin una kobor sokatna man∙jaha ine agandapaha.
