ACHIK aro dingtang dingtang NGO dolrangni bakrime Winter Capital na okgimu chake dabianio Gambegre ni MLA Saleng Sangma na agre sak 23 A∙chik MLA rangni ku∙gri ong∙e dongenganina A∙chik Youth Movement for Better Society (AYMBS) ka∙o nanganiko ba namnikgijaniko parakataha.
Tura songjinmao ACHIK aro gipin NGO dolrang bakrime Winter Capital aro Backlog policy ni bidingo antigni ong∙pile okgimu chake dabianiko dakgenchimoba Saleng Sangma na agre sak 23 A∙chik MLA rang maming aganchakaniko on∙kujaenganiara namen dukni katta ong∙a ine AYMBS ni President Peterjob A Sangma parakataha.
Election na kam ka∙ani somoiode jatni namgnina, a∙dokni nanganirangna ku∙rang on∙gen, kam ka∙gen ine ku∙rachake da∙o jrip donganiara ra∙chakna man∙gijani ong∙enga ineba ua agandapangaha.
Tura ko gnigipa a∙dokni skotong donna 1970 bilsio skanggipa Turao cabinet meeting ka∙manaha indiba uko da∙alonaba bimang ong∙atja. Ia dabiani bidingo sak 23 MLA rang da∙alo gitan apsan dake jrip dongangkuaia ong∙ode re∙baenggipa Lok Sabha election, GHADC aro 2028 ni assembly election-o aganchakna gita nanggen ine Peter agandapangaha.
Jatni nanganirangna dabianio niroke kam ka∙atpachina inen na∙simangko seoke watataha aro ia dabianiara niam gri ongja. A∙dokni gnigipa skotongko donani bidingo Chief Minister aro Governor an ra∙chake kam ka∙na gita man∙achim. Da∙alo ku∙gri ong∙enggipa MLA rang Saleng Sangma chiko skie ra∙e da∙alonaba chu∙sokna man∙kugijagipa kamko chu∙sokatna ja∙ku de∙na gita nanga ine Peter aganangaha.
