Tura songjinmako Winter Capital songna chanchisamsoaniko Governor na dongchakna nok rikenggipaon ma∙sina man∙enga ine New Tura Development Forum (NTDF) Sombar salo parakangaha. Uamangni agananigitade Winter Capitalna dabienganiko iarangchin gitchambegipa ong∙aniko mesoka ine janapangaha. Governor na dongchakani nokko rikna chu∙gimik gong 5.75 crore tangkarangko September 2009 o chamatna tik ka∙gimin ong∙a ine NTDF dolrang aganangaha. A∙bachenge chamatgipaoni rika cho∙anirang matchotjae galchipe donaniko man∙e, gnigipa changna gong 10.98 crore mang tangkarangko staff quarter rangko rikchapna chamataiaha ineba uamang parakangaha.
Gamchatbegipa Governor ni nokko rikanian Turako gnigipa skotong songjinma songna miksonganirangko mesoka aro iani bidingo mikkangchi jera ra∙ani, a∙kangani, dabiani aro pa∙sikani dongna nangjaha ine NTDF rang janapangaha. Iani bidingo sorkarinigita Tura ko skotong songjinma songna ra∙chakaha ingipa parakatanikosa nangskaengjok ine uamang agandapangaha. Ian pagitchamrangni jat ge∙gittam melie ra∙chakgimin mikjumangsa ong∙a aro uamangni dakgrikaniko an∙ching mande ra∙na nanga ine NTDF janapangaha.
