June jani 24 tariko a∙dokni skotong dilgipa Conrad Sangma uni ku∙chakgimin gita ACHIK, GSMC aro gipin NGO dolrangni dilgiparang baksa golpogrike chanchirimaniko dakenganio manderangni so∙sojengjeng ong∙anina Curfew ko walni somoio ra∙gatna tik ka∙aha. Ia ong∙a obostao Williamnagar-ni MLA Marcuise Marak, WGH a∙jani DC Jagdish Chelani aro bang∙a official-rangba CMO noko dongpae jaknanganiko man∙paaha.
Manderangni ding∙chaoe rong∙terangko goanichi adita pulis dolrangoni saknaako man∙angaha. Ia saknaa man∙gipa pulisrangna gong hajal 50 ko ex-gratia nigita on∙a Chief Minister Conrad Sangma ku∙rachake ra∙angaha. Manderangni gisepo ding∙chaoni aro kragija bewalo jako ra∙anina am∙sandianiko dake kamko ka∙anggen ine Sangma kobor ra∙timgiparangna parake on∙angaha.
Unbaksana ACHIK dolni dilgipa Laben Ch. Marak dabia a∙bachengaoni bon∙aona matchotate dakna miksonganio manderangni indake dakanina suk ong∙jae tom∙tome ja∙ku de∙angkuna ine manderangna mol∙molaniko dakangaha.
