ACHIK dolrang aro Chief Minister baksa Tura-o golpoe chanchirimani somoio ong∙gipa obostani gimin suk ong∙gijaniko aro ra∙chakna man∙gijaniko Education Minister Rakkam A. Sangma parakataha. ACHIK dolni name okgimu chake tom∙tome dabianiko nike namen kusi ong∙bea ine Sangma aganaha.
Uamangni indake tom∙tome dabianiko knachake Chief Minister agan-golpogrikna re∙baaha. Tik ka∙gimin biapona re∙bae ACHIK dol baksa gronge golpoani somoio manderangni kragijagipa kamrangna aro A∙chik skani ba jat tangni Chief Minister ko chadrapaniara namen kratcha∙ani aro nitogijani kam ong∙a ine Sangma aganangaha.
Uamangni dabianiara jatni namgninasa ong∙a, indiba ua somoio politics kal∙e jatska baksa so∙sojengjeng ong∙ate a∙dokni skotong dilgipako indake mande ra∙gija dakmesokaniara mandeskana, jong-ada no-abina aro songsalna kragijagipa kam ong∙a ineba Sangma agandapangaha.
