July jani 25 aro 26 tariko salgnina GHADC session ong∙atanio bang∙a sing∙anirangko dakna Council-ko chalaigiparangni chu∙ongagita somoirangko on∙jani gimin Kharkutta-ni MDC Cherak Momin uni suk ong∙gijaniko parakangaha. Bang∙a nang∙chongmotgipa chanchirimanirang jekai Uniform Civil Code, GHADC o kam ka∙enggiparangni dormaharangko pakwatani, Separate Electoral Roll aro Council-ni kamrangko ka∙anio namdapatna sing∙anirangko ra∙baahachim ine ua u∙iatangaha. CEM ni ku∙rachakgimin mingsakoba chu∙sokatna chanchirimaniko dakna cholrangko man∙gijanina Momin uamangni kosako matnange aganangskaaha.
Re∙baenggipa March 31, 2024 bisiona Council-ni dingtang dingtang department rangna chamatgimin tangka paisarangkoba u∙ina man∙angaha. Ia chamatenggipa tangkarangko District Council ko chalaienggiparangni jakkalsretanikoba ma∙sina man∙aha ine ua agandapangaha. Nangchongmotgipa chanchirimanina cholrangko on∙gija tangka paisani bidingo mangmang session-ko ong∙ataniara mikkangchi a∙jako namdapatna kam ka∙anirango namgijagipa dakmesokanisa ong∙a ine Cherak Momin parakataha.
