Meghalaya a∙dokni 46 gipa Chess championship ko Ri-Bhoi a∙jani Umsningo kal∙atgipa mijal salni bako bon∙kame kal∙ataniko ong∙ate matchotangaha. Ia kal∙susaanio Garo Hillsoni kal∙susagiparang chegipa ong∙bae a∙jana rasongko changsatai ra∙baaha. Garo Hills oni chess kal∙susagipa manderang oni nambatgipa gadang bongaoni, gadang brigipa biaprangko man∙e chebanagita man∙aha.
Skanggipa gadangko East Khasi Hills a∙jaoni Amit Ahsraf chegipani biapko man∙aha. Gnigipa biapko Garo Hills o ni Silkam Sangma man∙aha. Barbith Sangma jean changgnina kingking a∙doko chegipa ong∙e dongengachim ua gittamgipa biapko man∙baskaaha. Brigipa gadango Bensing G Momin aro bongagipao Marcosh N Marak chegipa ong∙skaaha.
Unbaksana Casarina Public School Turaoni Amaziah Gapesa Ch Marak, me∙chikrangoni nambatgipa kal∙gipa ong∙e skanggipa gadango chegipa ong∙baskana man∙aha.
Meghalaya Chess Championship kal∙susaanio nambatgipa sakbri Chess kal∙giparangko re∙baenggipa jao chong∙motan August jao Senior National Chess Championship Pune-o ong∙atnasienggipao Meghalaya a∙dokni palo kal∙susana seokangskaaha ineba u∙iataha.
