Meghalaya State Naming Authority Committee July ni 26 tariko chanchirimaniko dake ming 13 janapanirangko a∙dokni cabinet na chanchirime ra∙chakanirangko dakchina watatna miksongangaha. Ia janapatgiparangara adita biaprang, ramarang aro nok ba buildingrangko biming mingjitani bidingo ong∙a.
Skanggipa tom∙aniko dakani ja∙mano committee ni Chairman aro Cabinet Minister Rakkam A. Sangma ia ming 13 janapanirangko uamang chanchirime aro a∙dokni Cabinetna bon∙kame ra∙chakaniko dakchina gita watatna tik ka∙angaha. Iarangara dingtang dingtang department, legislator-rang aro manderangni janapani ong∙a ine Sangma aganangaha. Ianoni mittamrangkode batanggimin Cabinet tom∙anio chanchirimaniko dakahachim jekon name taljanigimin nipiltaianiko dakchina gita committee watatpilaha ineba Sangma aganangaha. Iani bidingo re∙baenggipa Cabinet meeting-o chanchirimaniko dakangen ine Sangma agandapangaha.
