National Education Policy (NEP) 2020 ko August jaoni ra∙gatna bang∙a niksenggipa college rang tarisamsoengaha ine Education Minister Rakkam Sangma aganangaha. Dam 43 college-rangoni dam 33 college-rangde NEP-ko ra∙gatna bilsokgijaniko parakangaha ine Sangma u∙iataha. Iani bidingo NEHU ni Vice Chancellor Prabha Shankar na sorkari u∙iata dongaha aro NEP ko ra∙gatna mikkang bilsiona ra∙doatchinaba janapataha ine Sangma agandapangaha.
Vice Chancellor aro sorkarini official-rang baksa July 4 tariko golporimanio NEP ko ra∙gatna dingtang cholrang donga ine NEHU ni VC aganangaha. Uni agananigitade je college rangan NEP ko ra∙gatna tarisamsoa dongaha uamang a∙bachengna man∙gen aro jemangan bilsokujaenga uamang mikkang bilsioni a∙bachengna man∙skagen ine aganangaha.
Sangma iani bidingo VC ko bang∙a bida nokrangni skotong dilgiparang baksa tom∙bimonge NEP ko ra∙gatna dingtang cholrangni gimin golporimchina didiataha ine aganangaha. University ko pilak chanchirimanirangko nambegipa bewalo aro maming nanggrikanirang donggijagipa ong∙e dakdilchinaba Sangma mol∙molataha.
Chatro chatrirang jemangan graduation matchote Delhi University ba Jawaharlal Nehru University rango poraina miksongani gnanggiparang ja∙manchakani ong∙naba donga ine Sangma aganangaha. Ia dal∙dalgipa University rang four-year undergraduate programme (FYUP) ko a∙bachenga dongkuja. Ia university rango napna chatro chatrirang ja∙manchakgenchimode chadamberangna gimaaniba ong∙gen in Sangma agandapangaha.
