Tura songjinmao golmal ong∙atanio jak donga ine chanchichipe sorkari ramram manderangko rim∙chimongna nangja ine Congress dolni dilgipa Saleng Sangma aganangaha. Namgipa am∙sandianiko dakesa sakkirangko man∙e mongsongbatgipa golmalo jak donggiparangko pulis dolrang rim∙na nanga ine ua parakataha. Winter Capital-na dabianio ia so∙sojengjengko ra∙baanichi Garo Hills na dal∙bea gimagnigipa ong∙enga ine Sangma agandapangaha.
Winter Capital-na dabianio namen batrikrikaniko niknagita man∙engahachim jean da∙o bon∙chongdikna nangao ga∙akaha. Iako ra∙bana pilak okgimu chake dabianirang indin ong∙gramaiaha ine Sangma aganangaha. Uni agananigitade ian saksa sakgnini daka kamni a∙sel ong∙aha aro iani bidingo name sing∙sandianiko dakanichisa dosi dakgipa manderangko ma∙sina man∙gen ine Sangma agandapangaha.
