Sombar salo Turani CM Office mikkango kajia golmal ong∙ani bidingo TMC ni dilgipa Dr. Mukul Sangma-ni pulis dolrangni kosako agangipa kattarangna Deputy CM aro Home-ko jako ra∙enggipa Prestone Tynsong raken jegalaniko dakataha. Mukul Sangma-ni pulis dolrangko politics o dilgiparangni jakkalgipa ostrorang ine agananiara uamangko chonikani ong∙a ine Tynsong parakangaha.
Mukul Sangma-ni Chief Minister ong∙mitingo ua pulis officer-rangko an∙tangni namgninasan jakkalahama ine Deputy CM sing∙doaniko dakangskaaha. An∙tangni namgninasan uamangko jakkalaiode ian namen rasong gribeani ong∙a ine ua agandapangaha. Chief Minister, Deputy CM ba jeba ong∙china, indiba sorkari aro pulis dolara manderangko naljokatnasa kam ka∙enga ine ua parakangaha.
