Garo Hills Autonomous District Council (GHADC)-ni gitcham Secretary Hewingson Sangma Meghalaya Lokayukta Act-o niamko gital daktaianiko Meghalaya High Court-ni ra∙gatanina ra∙bia gnang Supreme Court-o mokordoma ka∙na apjitangskaaha.
Prevention of Corruption Act-o Lokayukta ni ge∙etanio pangchake dosi donganio Sangmako mokordoma ka∙aniko ra∙galchina mol∙molaniko Meghalaya High Court ia bilsini July 10 tariko jechakataha. Sangma Meghalaya Lokayukta Act 2021 o ra∙gatgimin niamni kosako ra∙bianikoba dakangaha.
Sangma ni dabianiko da∙al salni bako Apex Court o janapaniko dakangen ine Supreme Court-ni ukil Shahrukh Alam Kachario aganangaha. Apsan dake iani bidingo knalo India-ni Chief Justice D Y Chandrachud ni Court o dongpaanio janapaniko dakangtaigen ineba Kachari parakataha.
Sangma-ni mol∙molaniko ukil Akriti Chaubey-ni gita badi ka∙aha jekon ua Section 20, 21 aro 50 ni gita Meghalaya Lokayukta Act-ni niamko pe∙ani ong∙a jeon a∙sel ong∙a gri naljokatna gita dakgnirangko segatgimin gnang ine aganangaha. Unbaksana badi ka∙anirangko dakna skang u∙iatchengna nangani niam gnang ineba Sangma talate agandapangaha.
