A∙doko janggi tangna ge∙e game cha∙giparangko tang∙doatna Jackfruit Mission ko a∙bachengate on∙anichi manderangna janggi tangna namgipa cholko on∙angaha. Jackfruit Mission ko skanggipa changna re∙anggipa 2018 bilsio a∙bachengate, da∙o bon∙kamgipa bilsio bang∙a chu∙sokanirangko nike ia Missionko mikkangchiba dakangkuna a∙dok sorkari manchiangaha.
Te∙brongoniko tarigipa cha∙ani bosturangko palaniko dakna salsana State Convention Centre-o ong∙atgipao ‘Jack Start 2023’ ko Agriculture Minister Ampareen Lyngdoh oprake on∙angaha. Ia missionko a∙dokni namgnina dontongatgija dakchake on∙anian ge∙e game cha∙giparangna mongsonggipa kam ong∙a ine Lyngdoh koborna parakataha.
Ia missionko bilsi bongana dake on∙anio baditana gital pale sim∙e cha∙giparang nakataha aro tang∙doaha name u∙ikujani gimin ia missionko ra∙gatangna nangchongmotengkua ine Lyngdoh aganangaha.
Game cha∙gipa dolrang baksa agangrikanio, bang∙a kamrangko nakatatna man∙aha aro pale sim∙e cha∙giparang salantio gong 10,000 oni 15,000 rangona kamaina dakchakengaha ine u∙ina man∙aha ine Lyngdoh parakataha.
Jack Mission 2.0 ko mikkang bilsio chu∙onga gita tangka paisarangko chame a∙bachengate on∙e, Chief Minister dakchakangkugenchimode namen kusi ong∙begen ineba Lyngdoh aganangaha.
Skanggipa Jackfruit Mission na gong 20 crore ko am∙ahachim indiba sorkari gong 5 crore kosan chamnagita man∙aiaha ine ua u∙iataha. Bang∙gija tangka paisa rangchi bang∙a tang∙doanirangko nikna man∙aha aro mikkangchiba ia missionko dakangkuchina Lyngdoh didiangaha.
