Sombar salo Turani CM Office o kajia golmal ong∙anina MDA ni ku∙wattimgipa Dr. Ampareen Lyngdoh uni kusi ong∙gijaniko parakataha. Ian a∙doko political party-rangoni namgijagipa dolrang ong∙katna a∙bachengengaha ine Lyngdoh aganangaha. Ua somoio manderangni ding∙chaoaniko mesokaniara namen ra∙chakna man∙gijagipa ong∙a aro tom∙tomaniko nosto ka∙aona ra∙bagipa ong∙a. A∙doko tom∙tomaniko nosto ka∙aniko champengna, political party rangoni indake namgijagipa dolrang ong∙kataniko dontongchina Lyngdoh didiangaha.
A∙dokni Chief Minister Conrad Sangma ko chadrapani bidingo police dolrangni parakatenggipa report-rangoniko nikna man∙soe, ian political dolrangni jak donganiko ma∙sina ama ine Lyngdoh aganaha. Gipin a∙dokrango nikenggipa namgijagipa political dolrangni chalaienggipa kamrang Meghalaya a∙dokonaba napaengaha aro ian kenbegnigipa ong∙enga ine ua agandapaha. Ong∙anggimin obostani bidingo anga raken jegalaniko daka aro dos donggipa manderangko pulis dolrangni rim∙chimonganiko nike pilsade kusiba ong∙a ine Lyngdoh agandapangaha.
