ACHIK dol Reservation Roster Backlog policy-ni bidingo kamrangko ka∙china aro Tura-ko Winter capital songchina batanggimin salo sal 14-na okgimu chake dabianiko dakangaha. Okgimu chake dabianiko dakangengon West Garo Hills a∙jani Deputy Commissioner Jagdish Chelani-ba July 18 tariko ACHIK dolni manderangko re∙bae grongeaha aro apsan dake CM ba uamang baksa salrangko tik ka∙ani ja∙man grongna re∙bagen ine u∙iataniko on∙angaha. July 24 tariko Chief Minister Mini Secretariatona re∙bae golpo agangrikanirangko dakangaha. Chief Minister-ni sokbana skang ACHIK dolni dilgiparangoni saksa Laben Ch. Marak, bakrimaniko mesokna re∙bagipa aro adita dingtangtang dolni manderangkoba mittelangaha. Unbaksa Laben Ch. Marak ua salo Chief Minister baksa tom∙e golpogrikanio tom∙tome maming an∙chi pari ba mata bu∙a gri matchotatna man∙na gita sakantikon jak on∙pachina mol∙molangaha.
Chief Minister aro ACHIK dolni gisepo chanchirimanirangko dakani somoio adita somoina manderang a∙palo tom∙tome sengaha, indiba konta gittam sengani ja∙mano adita manderang ka∙o nangani kattarangko aganbachengaha. Ia tom∙anio ma∙sina man∙gijagipa churing chupeke re∙bagipa manderangba gnangchim, aro uamang darangni agan skie beng∙e ra∙akoba knachakgija chrik a∙bokna a∙bachengaha. Uamangni indake kragija dakmesokako nike kattarangko knachake ra∙nagipa ong∙ja diba an∙tang skako dakdrae kajia ka∙na re∙bagipasa ine ma∙sina gita man∙a.
Chief minister aro ACHIK dolni dilgiparang baksa golpogrika konta 3 mang ong∙ani ja∙man a∙palo manderangni ka∙o nange chrike donganina uamangko tom∙tomatna jotton ka∙beaha, indiba manderangko tom∙tomatna gita man∙jaha. Batesa manderang dilgiparangni aganako knachakgija chokkirangko galdapna, rong∙terangko gotatna gita a∙bachengaha. Ia a∙sel ong∙anio skanggipa me∙chik pulis rongte gotata nange saknaako man∙aha, uni ja∙mano adita pulisrangba skoo rong∙te nangani a∙sel saknaako manaha, ja∙a rongrete aro be∙en-ni bako saknaanirangkoba man∙tokaha. A∙sel ong∙ani batrikrikenganiko champengna police rang tear gas rangko goaha aro uni a∙sel manderang gipin biapchina katna a∙bachengaha.
Asel ong∙chakgipa biapo adita tom∙tomani ja∙man tom∙dakgipa biapo chokkirangni nosto ong∙anirangko aro dal∙dala rong∙terangko dane don∙akoba nikna gita man∙aha. Fire brigade garini glasskoba dokpruaha, okgimu chakram pandal nok ko so∙aha aro adita pulis garirangkoba manderang so∙e galangtokaha. Rama gipin dongjani a∙selo adita skul bi∙sarangba wal 10 bajimang ja∙manosa noktangchina re∙angpilakoba nikrikna gita man∙aha. Bang∙a Dakopgre jolo hajira kam kae cha∙giparangba waltingosa noktangtangchina re∙pilna nangao ga∙akaha.
Ia 24 tariko Mini Secretariat-o ong∙gipa obostarangni bidingo chanchipilon bang∙a gisiko chanchianirang soka. Chu ringe re∙bagiparangko nikengon bang∙a chanchianirang soka je∙kai, A∙chik a∙songni namgnina nangchongmotani bidingo golpo chanchirimanio maidake churing chupeke re∙bana pa∙a? Indake dakaniara kraani ong∙ama? Chu peke mikron gitchakpile re∙bagipa chadamberangara ong∙ako dakahama? Tom∙tome chanchirimaniko dakengmitingo je manderang gipinrangko ding∙chaoatahachim uamangba okgimu chakgiparangchimma? Uamang ma∙sigrike chanchianirangko dakna miksonge re∙bagiparangchimma ma kajia aro so∙sojengjeng ong∙atna miksonge re∙bagiparangchim ma? Ia tom∙anio nangchongmotgiparangni bidingo chanchianirangko dake jatna namgni ong∙gen ine A∙chikrangan dakdilahachim, indiba A∙chikrangan jatskani name dakdilakoba salrike tom∙aniko tom∙tome matchotna on∙gija so∙sojengjeng ong∙anirangona sokataha.
Mikkangchi indakgipa somoirang sokode maikai manderang gisik nange kraa bewalo kam ka∙na man∙gen iani bidingo chanchirimaniko dakna nangchongmota. Saniba hai ine aganana bik hai inpagija, ua mande maiko miksonge aganenga aro uni kattarang manderangko namaona dilgenma, ma uni kattarang dilsretaniona sokatgenma? Ia ong∙anggimin obostarangni bidingo manderang gisiktango chanchibewalaniko dake ja∙ku de∙anirangko dakna nangchongmota.