Japan, United Kingdom, UAE aro Singapore a∙songo donggipa company-rang Meghalaya a∙dokni nurse-rangko kamo ra∙napna miksonganiko Health Minister Ampareen Lyngdoh parakataha. Meghalaya a∙doko adita namnamgipa nursing institution rang a∙doko donggenchim ong∙oba bang∙a skia man∙gipa nurse-rang kam gri dongengani gimin uamangna minggipin cholrangko on∙angna gita Labour Minister baksa chanchirimaniko dakanggen ine Lyngdoh aganangaha. Iarangko nike gadangni kri cholrangko on∙a miksonge ia ja∙kuko de∙enga ine Lyngdoh aganangaha.
State Convention Center-o ong∙atnasienggipa nursing job fair o bak ra∙na an∙tangtangni bimingko segate ra∙giparangko Delhi, Mumbai aro Bangalore a∙dokrango skie ra∙aniko on∙anggen. Ia skie ra∙ani a∙baona re∙bagiparangko sorkari nama gadango uamangni skanio pangchake dangdike on∙anggen ine ua aganaha. Iako dakna sorkari adita tangka paisarangko jakkalanggen jeon dingtang dingtang company-rang baksa MoU ko soi ka∙anggen ine Lyngdoh janapangaha. Unbaksana jemangan apalchi kam ka∙na gonggiparangna 1.5 lakh ba 2 lakh rangko japrako on∙na tik ka∙aniko janapangaha.
