Opposition dolrangni party-ko mingteanina matnangani bidingo sing∙aniko dakon party-ko niteaniko officer-rang an∙tangtangna u∙inagitasa dakaha ine WGH a∙jani DC Jagdish Chelani parakangaha. Uamangni bimingrangko party baksa mingtena maming miksongani dongja jekon manderangna parakatna nanggijako somoi aro a∙selni kri segate dongimin jinmaona sokangskaaha ine DC aganangaha.
Ia manderangko party baksa segatanio maming tol∙e dakani dongja aro iako jinmana parakataniara ong∙na kragija ong∙aha ine ua janapangaha. Party ko segatgenchimoba ua manderangko party o pangchakgija uamangni kam ba dos dakani krisa rim∙aha ine DC agandapangaha. Department-oni je mandean iako jinmana u∙iatanio kragija kam ka∙gipako rim∙a man∙ode raka sastiko on∙gen ineba ua parakangaha.
Golmal kajiako ong∙atna didigipa manderangko rim∙na man∙tokahama ine sing∙anina, sak gittam kate dongenggipa manderang Rakhi Sangma, Chingkame Sangma aro Salgrik Sangma ko rim∙na pulis dolrang sandiengkua ine DC aganchakaha. Unbaksana uamang an∙tangtangko pulis dolrangna re∙bae bame on∙eode nambatgen ine didie aganangaha.
Kate dongenggipa dosi dakgipa sak gittam manderangko rim∙na gita police dolrang a∙dok-ni dingtang dingtang pulis thana rangona u∙iataniko ba ge∙etanirangko on∙atmanaha aro ru∙utgijan uamangko rim∙na ka∙dongsoenga ine parakangaha .
