A∙dokni Gram Sevak aro Sevikarangko tang∙doatna gita C&RD department, State Institute of Rural Development (SIRD) aro All Meghalaya Gram Sevaks-Sevikas Service Association (AMGSSA) bakrime salsani workshop program ko August 1 tariko ong∙atangaha. Songsalni namgnina nambate dangdike on∙a aro uamangna ka∙donganiko on∙e kam ka∙aniko bilakbatatna man∙agita miksonga gnang ia program-ko ong∙atangaha. Ia program-ona Khasi hills, Garo hills aro Jaintia hills-oni sak 100 mang Gram Sevak aro Sevikarang a∙dokni dingtang dingtang biaponi re∙bae bakko ra∙angaha.
Ia program-o bak ra∙gipa sakantian Meghalaya a∙dokni dingtanganina kam ka∙na ku∙mitchetangaha, kamrangko ka∙anio nambatatna aro neng∙nikanirangko jinma tom∙e chanchirimangaha. C&RD department ni Commissioner & Secretary FR Kharkongor, Gram Sevak aro Sevika rangni namgipa kamna de∙mittele aganangaha. Uamang a∙dokna aro songsalna gamchatbegiparang ong∙ani gimin uamangko tang∙doatna aro dingtangatna jako ra∙e kam ka∙na nangchongmota ineba ua agandapangaha.
