Sak 100 mangna batpile u∙ina man∙gijagipa manderang Gurugram-ni Sector 57 jolo Muslim rangni olakkichakram biapko Mongolbar pringwalni bako wa∙al so∙aha. Ia ong∙a obostao ua manderang ‘Imam’ ba toromni dilgipa Mohammad Saadko miksongmanchae so∙otaha ine olakkichakram biapko nirokgipa Izhar u∙iataha.
Haryana pulis ni Assistant Sub Inspector (ASI) Sandeep jean a∙sel ong∙gipa biapo dongpae nike obostani gimin mokordomako ka∙aha. Jemangan chadrapaniko dakaha uamang toromni gita chrik a∙boke pulisrangko ro∙ong goaha aro torom nokchi napdrae slairangchi gona a∙bachengaha. So∙otako man∙gipa Mohammad Saad ko go∙olrangchi dokgrimtokaha unbaksana Khurshid Alam ko ja∙o guli nange saknaaniko man∙aha. Sakgittam manderang kajia ka∙giparangoni dongnue uamangni jakoni janggi joknagita man∙skaaha. Chadrapgipa manderangoni mitamrangko ma∙sinagitaba man∙aha ine Sandeep parakataha.
Ua a∙sel ong∙ani ja∙mano Gurugram ni dal∙dalgipa pulis officer rang biapona sokange am∙sandianikoba dakangaha.
