A∙doko bang∙bata college-rang National Education Policy 2020 ko ra∙gatna miksonganiko Shillong songjinmaosan ong∙aigija gipin a∙jarangoba ra∙chakna namnikaniko mesokangaha. Iani bidingo NEHU ni Vice Chancellor aro Meghalaya College Teachers Association (MCTA) ni chanchirimaniko sengenga ine uamang parakangaha. College rango stream ge∙sako chalaigiparangba NEP ko ra∙gatanio neng∙nikaniko mesokjaha aro jerangan VC baksa tom∙anio dongpaaha uamangba apsan namnikpaaniko mesokaha ine Sankardev College ni Principal Dr. Eureka FP Lyngdoh parakataha.
Don Bosco College Turani Principal Fr. Bivan Rodriques Mukhim NEP ko ra∙gatna re∙mikkangna miksonganiko parakataha. Skanggipa semester-ko uamang bilsi 3 ni dakbewal niamko ja∙rike a∙bachengataha. A∙bachengo NEP ko ra∙chakna neng∙nikanide Garo Hills ni gipin College rangko nigrikesa dakaha ine ua aganangaha. NEHU baksa tom∙bimonge name songgigrikani ja∙mano NEP-ko College o ra∙gatanggen ine ua agandapangaha. College o skigiparang aro chatrorangkoba ua jajrenganirang dongpajachinaba janapataha.
Mawkyrwat Sngap Sing Syiem College ni Principal, Dr. Kyntiew Kupar Nongsiej NEHU ni ge∙eta gitan NEP ko August 1 tarikoni ra∙gataha ine janapataha. Iako uamang chatro chatrirangni namgnina miksonge dakaha ine ua parakangaha. Jowai ni Kiang Nangbah Government College-ni Principal, Dr. Easter Meena Blah skanggipa semester ni class-rangko NEP ni ning∙o re∙baenggipa antioni a∙bachengatgen ine parakatskaaha. Shillong College ni Principal Dr. E Kharkongor ni agananigita uamangba ia antini Sukrobar salonin NEP ko ra∙gate class rangko a∙bachengatgenok ine miksongangaha.
