National Education Policy (NEP) 2020 ko a∙doko ra∙gatna re∙mikkangna miksonganiko Chief Minister Conrad Sangma parakangaha. Ia kamko pilak manderang, skigiparang aro college rangni ka∙donge bakrimpaaniko man∙esa sorkari re∙mikkangna nanggen ine Sangma aganangaha. Ku∙cholsan ong∙e kam ka∙anichisa iani bidingo neng∙nikanirangko naljokatna man∙gen ineba Sangma agandapangaha.
Kam ka∙nagipa manderang aro rika cho∙ani bidingo chu∙onggijani a∙selo NEP ko ra∙gatanio bang∙a neng∙nikanirangko a∙doko chagrongna nangenga ine ua aganaha. NEP-ko ra∙gatna neng∙nikaniko man∙enggipa college rangna sorkari nangagita dakchakaniko on∙a miksonganiko Sangma janapangaha.
Deficit college rang jerangan management committee rangni dakchakaniko man∙enggiparang uamangni dakchakaniko man∙angkuaigen ineba ua u∙iataha. Sorkari gimik collegerangni neng∙nikanirangko niroke dakchakgen ine kumitchetna man∙ja maina management committee aro college rangni ku∙cholsan ong∙e kamko ka∙anichisa chu∙sokgipa ong∙na man∙gen ine Sangma aganangaha.
