WGH a∙jani Jengrapara songo bilsi 12 ong∙gipa me∙chik bi∙sako til∙ekdrae gitok rasote so∙ota

West Garo Hills a∙jani Bikonggre jolo bilsi 12 ong∙gipa me∙chik bi∙sa saksako gitok chotomna am∙pile rasote galangaha ine koborko man∙soaha. Bi∙sako til∙ekdragipa aro so∙otgipa ine potchipenggipa noksulni mande kate chakenggipako pulis dolrang am∙sandianiko dakenga. Ia ong∙a obosta Phulbari pulis station ni ning∙o donggipa Jengrapara jolni Bikonggre songo bi∙sani ma∙aparang mande sigipaona re∙angmiting somoio ong∙aha ine parakataha.

Koborko man∙soanigitade bilsi 12 ong∙gipa demechikba uni ma∙a paa baksa sigipaona re∙angpaaha jekon nokko nirokena aro bijolirangko kimitechina watatahachim ine u∙iataha. Sigipaona re∙bapiljani gimin ma∙a paani nokona re∙bapilon bi∙sani an∙chirara dake dongakosa nikeaha ine aganaha. Ia ka∙namgija kamko ka∙gipako pulis dolrang am∙sandianiko dakangkuenga ine koborna parakataha.