Garo Hills a∙jao burung bolgrimrang aro ong∙telaigipa gam jin rangko ripingani bidingo Garo Hills Environmental Protection Society (GHEPS) ni gita bongagipa gipa Environmental Awareness Programme ko Chokpot farmers’ market buildingo ong∙atangaha.
Ia program o GHADC ni Deputy CEM Nikman Ch Marak mongsonggipa sokgipa ong∙e burung bolgrimni gamchatani gimin aganangan baksa buring bolgrimko ripingna gita GHADC dongimin niam retirangni giminba talate on∙angaha. Chokpot ni SDPO John Clitzter A Sangma samtangtango donggipa sambol, buring bolgrim, matburing, balwa-rangko dal∙nike aro simsake rakkina nangani gimin aganangaha. Apsan dake A∙chik Baptist Krima ni President Grosswell Sangma toromo pangchake mande aro samtangtango donggipa sambol aro matburingrang baksa mande ra∙grike dongna nangani gimin skie on∙angskaaha.
Chokpot Parish ni Rev. Father Salnesh D Sangma ba ia program-o rongtal an∙talanian Isol ni a∙baona sepangatani ong∙a ine aganangskaaha. Unbaksana gitcham GHADC CEM P K Sangma, mandeni burung bolgrim baksa nangrimgrike ba pangchakgrike janggi tangna nangani bidingo agantalate on∙angskaaha.
Ia tom∙anio a∙dokko sason ka∙enggipa dal∙dalgipa dilgiparang, Government Official rang, songsalni dilgiparang, Nokmarang, toromni dilgiparang, skulni skigiparang aro adita skulrangni chatro chatrirangba bakko ra∙angaha. Tom∙anio bakko ra∙gipa sakantian burung bolgrimrangko ripingangna ku∙mitchetanirangkoba dakangaha aro batanggimin somoio Tura-o ong∙gipa a∙selna aro Manipur ni tom∙tomaninaba bi∙aniko dakangjolaha.
