A∙doko mikka waanichi chirangko chu∙ongagita man∙genchimoba bijoli den∙aniko dakkuengani gimin Saliram jolni Dadenggre GSU dolrang Bristibar salo sing∙doaniko dakan baksa bijoli den∙aniko dontongatchina sorkariko didiataha.
Umiam o chini gadang 3201.89 ft mangona tang∙doaha jekon tosusagenchimode skanggipa gadango 3165 ft aro gnigipa gadango 3229.2 ft mang ong∙aha. A∙dokni manderang basakona ia neng∙nikanirangko chagronge dongnagita nanggen aro a∙doko bijoliko baditana mancha bikotengako u∙iatchina GSU dol dabiangaha.
A∙doko bijoliko dontongatgija watnagita mikka waanirangko nangkuengama aro basako bijoli den∙aniko ra∙galna sorkari tik ka∙nasienga ine sing∙doanikoba dakangaha. Unbaksana Chibragre-o matchotgimin Ganol Hydro Electric power project ko maidakgipa gadango kam ka∙atenga ineba sing∙doangaha.
Meghalaya a∙dokni neng∙nikanirangko ma∙sie MeECL department aro sorkariko bijoli den∙aniko bakan dontongatchina u∙iata gnang GSU dol mol∙molaniko dakangaha. Sorkari manderangni nanganirangko dangdike on∙gipa ong∙ani gimin manderangni mol∙molaniko knachakna nanga ine GSU agandapangaha.
