A∙doko National Education Policy (NEP) 2020 ko nambata cholrangchi ra∙gatna am∙sandianiko dakanggen ine Meghalaya State Education Commission (MSEC) ni gital chairperson Professor S.M Sungoh aganangaha. MSEC ni skanggipa changna tom∙bimonganio Chief Minister Conrad Sangma, Education Minister Rakkam Sangma aro gipin Commission ni dilgiparang a∙dokni skia porani bidingo chanchirimangaha.
Commission ko ra∙gatani miksonganiara school aro college ni niamrangko tarina, dormaha aro rikgimin skul, college nokrangko nirokna, skulko chalaienganiko nirok sandina a∙dok sorkarina u∙iatna dakchakna songangaha. Una agreba ia Commission dingtang dingtang cholrangko sandie sorkarini on∙gimin niamrangko maikai school aro chubatgipa gadango poraigiparangna NEP 2020 ni gital taritaigimin niamo pangchake nambatgipa gadango lekka porako skie ra∙na dakchakani ong∙a.
