Assam aro Meghalaya a∙dokni sima ari jolo dongenggipa Block-I biapko Chief Minister Conrad Sangma aro Assamni Chief Minister Himanta Biswa Sarma, Independence Day-ko maniani ja∙mano re∙ange nina tik ka∙e donangaha.
Batanggimin salrango sima ari jolo dongenggipa Khasi aro Pnar jatrangko bobil dakgipa dolrangni ka∙mikkenatanina Jaintia Students’ Union, Chief Minister Conrad Sangma ko bobil dakgipa dolrangko am∙sandianiko dakchina mol∙molanagaha.
Sima ari jolo so∙sojengjeng ong∙anirangna Assam ni skotong Minister baksa golmal ong∙anirangko tom∙tomatna chanchirimaniko dakangaha ine Conrad Sangma aganangaha. Unbaksana Deputy Chief Minister Prestone Tynsong, Block-I o donggipa biaprang Assam a∙dokni sason ka∙ani ning∙osa ong∙ani gimin Meghalayani pulisrangko ua biaprango nirokna donatna man∙jawa ine aganangaha.
