National Education Policy (NEP) 2020 ko a∙doko ra∙gatna miksonganiko skigipa dolrangni ra∙chakna man∙jani a∙selo chu∙sokatnagita man∙kujaenga. Iani bidingo NEHU ni Vice Chancellor Prabha Shankar Shukla aro Education Minister Rakkam Sangma re∙baenggipa salsa ba salgni ni gisepo gronge NEP ko ra∙gatanio neng∙nikanirangko chanchirimangen ine u∙iataha. Uamangni tom∙e chanchirimanganio pangchakesa NEP ko ra∙gatani bidingo nanga ja∙kurangko de∙angna miksonganikoba parakataha.
August jani 10 tariko Meghalaya Higher Education Council-ni tom∙aniko Education Minister dilanggen jeon sorkari ni official, college-ni dilgiparang aro NEHU ni officialrang chanchirimanio bakko ra∙anggen.
Meghalaya College Teachers Association (MCTA) ni NEP ko drae ra∙gatna miksongenga ine jegale sedoatgipa chittina VC aganchakaniko dakanggen ine kobor ra∙timgiparang parakataha. NEP ko under graduate college-rango ia bilsioni ra∙gatna am∙aniara namen aiao inmanani aro ra∙chakna man∙gijani ong∙a ine NEHU ni Vice Chancellor-na MCTA chittio janapate seataha.
HYC aro NEHUSU tom∙aniko ong∙ate dingtang dingtang bako donggipa manderang, skigiparang, college-ni Principal, a∙dok sorkarini official aro Civil Society-ni memborrang baksa chanchirimaniko dakanggen. Unbaksana jinmani ra∙chakna man∙gipa chanchirimaniko daknagita adita ku∙pattianirangkoba uamangna janapange a∙doko NEP ko chu∙soke ra∙gatnagita kamrangko ka∙angna man∙gen ine VC aganaha.
