East Garo Hills a∙jao Songsak songoni nokdang ge∙sa uamangni game cha∙enggipa baganoni guare kagiparangko nosto ka∙ani ja∙mano district administration-oniko naljokataniko on∙china mol∙molangaha. Nokgipani agananigitade nosto ka∙na re∙bagipa manderang an∙tangtangko Deputy Commissioner Office-oni ge∙etako man∙e re∙baaha ine u∙iataha. Ia kamko Willot Ch. Marak aro unbaksa re∙bapagipa adita manderang baksa August 2 tariko pring 8:30 bajimango dakaha ine bagan nokgipa Walling M. Sangma district magistrate na janapataha.
Bagan nokgipani agananigitade uamang atte, korat aro gojal okgiparang baksa re∙bae bolni guareko pe∙na a∙bachengaha ine u∙iataha. Uamangni re∙baako nike bagan nokgipa aro uni nokdangni manderang kenjagoke sepangbatgipa buringo nape katskaaha. Batanggiimin salrango Willot Ch. Marak, adita songrangko nangdimatgipa ramarangko baganni guarerang champengenga ineba uamangni kosako matnanganirangko dakaha. Marak aro uni rimbagipa manderang bagan nokgipani nokdangko je somoioba re∙bae ka∙namgija kamko ka∙na kenchaksoenba DC ni naljokataniko aro uamangni kosako am∙sandianiko dakchina didiangaha.
