Garo Hills o skia poraianiko dontonggiparang batroroaniko naljokatani ja∙kurangko de∙na Education Minister Rakkam Sangma adita elementary gadangni skigiparang, MBOSE aro Education Department ni official-rang baksa Tura o tom∙e chanchirimangaha. Skulrango skie ra∙aniko dontonganirang primary aro secondary gadango apsan daken batroroenga jean a∙jani tang∙doaniko champengenga ine Education Minister aganangaha. A∙jao skia porani bimangko nambatatna aro gisiko nangatgipa ja∙kurang de∙na miksonge ia tom∙anio chanchirimangaha.
A∙jao skia porani gadangko bi∙sarangna nambate bidako pakwatna apsandakgipa skiani niamko jarikanirangko re∙baenggipa salrango jakkalanggen ine Sangma ku∙watangaha. Pilak sorkari skulrang aro skigiparangko gisiko nange on∙kanga gnang kamko jako ra∙chinaba Sangma didiangaha. A∙jani skulrango rika cho∙aniko namdapatna, skulo ra∙gipa subject-rangko on∙dapna, skigiparangko tarina aro dakchakani a∙bako bilakbatatna chanchirimangaha. MBOSE Executive Chairman Ambrose Ch. Marak, WGH a∙jani DC Jagdish Chelani aro gipin gadangni officer, skul aro college rangni Principal rang, skigiparang ia tom∙anio uamangni namnamgipa ku∙pattianirangko a∙jao skia porani gadangko namdapatna agane on∙angaha.
