Manipur a∙dokni Imphal West District o golmal ong∙taianio manderang nok ge 15 rangko so∙aha ine official-rang Robibar salo parakataha. Chel∙chakatna donggipa sipairang manderangko katatna aro tom∙tomatna tear gas-rangko gona nangao ga∙akaha. Ia ong∙a obosta ong∙anio bilsi 45 ong∙gipa me∙asa saksako guli nangaha jekon Regional Institute of Medical Sciences (RIMS) ona ra∙ange sanna bannaniko on∙enga. Official rangni parakatanigitade ua da∙o janggi naljoke dongenga ine u∙ina man∙soaha.
Robibar pringo ua biapo maming golmal nakataianirang dongjaha aro nirok sandianiko name dakna man∙a gita wilwalao donggipa biaprango manderangko ong∙katgija dongna rake beng∙aniko dakatskaaha. Minggipin gitalgipa kajia golmal ong∙ani Imphal East district Checkon jolo ong∙kataniko nikangaha jeon adita nokrangko wa∙al so∙chipe donangaha ineba u∙iatangaha. Manipur a∙doko 2023 May jaoni so∙sojengjeng ong∙na a∙bachengaha aro ian da∙ona kingkingba tom∙tomani dongkujaenga.
