Bijoliko bikotchakram biaprangko re∙baenggipa bilsi sni ba bilsi chet ni gisepo matchotna ka∙dongsoanirang dongjani a∙selo Meghalaya a∙doko bijolina neng∙nikanirangko chagrongangnaba donga ine koborna parakataha.
Chu∙ongagita bijoliko man∙jaengani a∙selo bijoliko nangani aro watani gisepo neng∙nikanirang batroronaba donga ine saksa MeECL-ni sorkarini official aganaha. Bijolichi chalaigipa bosturang, mobile phonerangko jakkalani bariroroengani a∙sel bijoliko jakkalaniba batroroenga jean bijoliko bikote sualenggipa company rangnaba namen sinjetaniko on∙enga ine ua agandapaha.
Sorkari gnigipa phase-ni gita 280 MW Myntdu-Leshka Hydropower project aro Kynshi Hydropower Project jean 400 MW mangna bate bijoliko bikotnagita kamko ka∙enga ine ua u∙iataha. Ia project rangko ru∙uta bilsirangoni kam ka∙ataniko dakengaha indiba dingtang dingtang obostani a∙selo matchotnagita ru∙utkugen ineba ua parakataha.
